DÍA MUNDIAL DOS DEREITOS HUMANOS:TRABALLANDO EN IGUALDADE

O martes, día 3 de decembro xuntámonos para ver a película Figuras ocultas, que trata sobre as historias de tres mulleres extraordinarias que loitaron contra as dicriminacións racial e de xénero dentro da estrutura da NASA no contexto da carreira espacial dos USA fronte á URSS. Dorothy Vaughan, Mary Jackson e Katherine Johnson foron decisivas nun momento crucial para a axencia norteamericana na súa loita por non seguir detrás da Unión Soviética na "conquista do espazo".

Hoxe, 10 de decembro, Día dos Dereitos Humanos, celebramolo na Biblioteca do noso IES traballando sobre esta interesante película coa colaboración da materia de Igualdade de Xénero.

MERCADO DE INTERCAMBIO

Non podemos estar máis contentas co resultado da actividade do Mercado de Intercambio celebrado o pasado venres 29 de novembro, despois dun laborioso proceso de organización.

O troco foi fundamental nunha economía menos voraz e destrutiva que a actual. O alumnado da materia de Economía de 4º da ESO organizou esta experiencia.

Temos que felicitar tanto ao alumnado organizador como á súa profesora de Economía, Rosalía, e a todas e todos os participantes.

O mesmo venres había xente que xa pedía que se repetise a esperiencia. Ademais, dende un instituto de Pontevedra, puxéronse en contacto coa Biblioteca do Bouza Brey interesándose pola mesma e para preguntar pola organización e os resultados. Estamos, xa que logo, requetesatisfeitas por abrir a Biblioteca a experiencias tan interesantes e enriquecedoras

CINE FORUM FIGURAS OCULTAS

A BIBLIOTECA DO IES BOUZA BREY TRABALLANDO INTENSAMENTE NA EDUCACIÓN POLA IGUALDADE

Despois dun mes de novembro ás voltas coa prevención da violencia de xénero, comezamos decembro programando unha sesión de Cine Forum para ver a película "Figuras ocultas", baseada en feitos reais, que conta a historia de tres mulleres extraordinarias: Katherine Johnson, Dorothy Vaughan e Mary Jackson, que traballaron para a NASA facendo decisivas contribucións en plena carreira espacial, superando enormes barreiras raciais e de xénero.

O martes 3 de decembro ao mediodía ficamos para xantar na Biblioteca, onde vimos a película que nos propuxo o profesorado da materia de Igualdade de 2º da ESO.

AS CARAS DA CIENCIA

O noso concurso As caras da ciencia pretende divulgar grandes figuras que contribuíron ao desenvolvemento humano. Popóñense 4 personalidades sobre as que se ofrecen unha serie de datos. Agora toca pescudar quen é quen e explicar nunha ficha como chegamos a averiguar as nosas respostas. O xurado terá en conta a xustificación das nosas conclusións. Non deixedes de participar. Hai premios moi interesantes!

25 DE NOVEMBRO: MANIFESTO CONTRA A VIOLENCIA DE XÉNERO

MANIFESTO

QUEREMOS PROCLAMAR A NOSA VONTADE DE ERRADICAR A VIOLENCIA DE XÉNERO

Queremos proclamar a nosa vontade de erradicar a violencia de xénero.

NON  a rir ou dar o noso aplauso a quen humilla a unha rapaza.

NON a insultar as rapazas e mulleres chamándolles "putas" ou expresións parecidas.

NON a xulgar e criticar as nosas compañeiras pola súa maneira de vestir.

NON a crernos máis ou menos por pentencer a unh determinado xénero.

NON  a desprezar o camiño da igualdade entre as persoas con expresións como "feminazis" ou "hembrismo"

COMPRAS COMISARIADAS CO EQUIPO DE 1ºESO

En novembro non podiamos agardar outra cousa. A chuvia non nos deu tregua, pero o traballo de pescuda e selección do mellor da librería foi impecábel por parte do Equipo de Biblioteca de 1º ESO. Como sabedes, seguimos na teima de enriquecer o fondo bibliográfico con libros do fondo xeral, ou sexa, que non sexan obras literarias, xa que este apartado é o máis abultado da nosa Biblioteca. O obxectivo primordial era atopar na librería obras que nos axuden no noso obxectivo de desplastificarnos. Non se pode dicir que non fose frutífero o traballo, como podedes ver nas imaxes das adquisicións. Iso si, houbo moito debate entre os membros, ás veces acedo, e non todas volveron contentas para a Biblioteca do noso instituto.

De todos xeitos, aprendemos moito, mesmo a negociar e a renunciar. Agora, a molleira foi boa!

Felicidades ao alumnado que participou dun xeito tan responsábel e felicidades a todas as persoas usuarias da nosa Biblio, que a partir de xa teñen todos estes libros á súa disposición.

PREOCUPACIÓN POLO MEDIO AMBIENTE

Comezamos un curso marcado pola preocupación pola situación do planeta. "Desplastificándonos" é o lema que vai conducir o noso traballo. Somos conscientes de que temos moitísimas cousas que aprender, por iso queremos que a Biblioteca se encha de libros que nos dean ideas para poder levar pequenas accións na nosa vida cotiá de cara a reducir o consumo abusivo e absurdo no que estamos a vivir.

FEIRA DE LIBROS DE VERÁN

Para rematar o curso, que mellor cousa que levar para casa un -ou moitos- libros para ler no verán.

Así non só fixemos un préstamo masivo, como nas vésperas de anteriores períodos vacacionais, senón que tamén preparamos unha nova FEIRA DE LIBROS.

A Feira de Libros de verán foi organizada polo alumnado de 1º ESO, tanto o que pertence ao Equipo de Biblioteca, como amigos e colaboradores.

Quixemos intentar darlle unha nova oportunidade aos libros que foron retirados e expurgados do catálogo por levaren anos, en ocasións décadas, sen ser lidos -nin sequera consultados- por ninguén.

Foron moitas as persoas que se animaron a levar algún exemplar. Así unha pequeniña escolma dos artigos de Larra, un poemario de Antón Patiño, outro de Pura Vázquez, unha historia da Literatura Galega ou unha novela de Pérez Galdós terán unha nova vida este verán.

Aínda quedan uns poucos exemplares. Se pasas estes días polo instituto para facer xestións administrativas, non deixes de botarlle un ollo. Quizais haxa un libro agardando por ti.

XUNTANZA-XANTAR DO EQUIPO DE BIBLIOTECA

A xuntanza-xantar resultou unha preciosa festa para celebrar un curso de traballo do Equipo de Biblioteca do alumnado. Satisfacción é a palabra que sintetiza a experiencia. As usuarias e usuarios da Biblioteca énchena de vida, fána súa. Que máis se lle pode pedir?

Temos que agradecer ao alumnado de 2º de ESO e ao profe Pablo Chaves a preparación do xantar saudábel que saboreamos na xuntanza. Unha festa na que non faltaron os diplomas de agradecemento a todos os participantes. O diploma di así:

Grazas por encher a Biblioteca de vida. Ler. Soñar. Aprender a construír o mundo.

Grazas Equipo!

BARDOS 77

 Na imaxe da esquerda podemos ver a última entrega de Bardos. A autora das ilustracións da portada e a contraportada é Ali Lores, de 3ºESO. Esta entrega, que fai o número 77, chegou cargada de contidos, xa que corresponde aos dous últimos trimestres.

Nela participa alumnado de todos os cursos da ESO e de Bacharelato. Sobrancean sobre os demais contidos as entrevistas que Uxía Piñeiro e Paula Fernández de 1º de Bacharelato fixeron ao dous destacadísimos docentes, colaboradores da revista Bardos e que agora se xubilan. Trátase de Manuel Carballo e Carmen Fariña. O primeiro, ex-director do instituto e membro dende hai varios anos do Equipo de Biblioteca; a segunda, a "factotum" do Intercambio con Francia.

Moitas outras colaboracións dan conta da actividade do noso centro nos últimos meses: a viaxe a Londres, a celebración do Entroido, a vida da Biblioteca, o Intercambio con Francia, as estadías dos nosos Erasmus por Europa (neste caso na República Checa), o Clínic de Baloncesto e un longo etcétera.

ROTEIRO FRAGUAS-ROSALÍA

A celebración do Día das Letras Galegas, este ano dedicadas ao historiador e etnógrafo Antonio Fraguas, permitiunos relacionar de xeito natural as figuras de Fraguas e Rosalía de Castro. Deste xeito, o alumnado de 1º e 2º da ESO do noso centro gozou dun día de aprendizaxe e lecer na visita a  Iria Flavia (Padrón), á Casa Museo de Rosalía de Castro e ao cemiterio de Adina, así como a Compostela, ao Museo do Pobo Galego e á Praza do Obradoiro.

En Iria Flavia, na Casa Museo, recitamos poemas de Cantares Gallegos, precisamente o aniversario da publicación  en 1863 deste libro inaugural do Rexurdimento é o que marca a data de celebración do Día das Letras Galegas. No cemiterio da Adina, onde estivo soterrada a autora tamén recitaron un poema dedicado ao lugar.

En Compostela, na Praza do Obradoiro, puideron contemplar a monumentalidade dos seus edificios, ademais de escoitar a historia da inclusa, que estivo situada no Hospital Real, actual Hostal dos Reis Católicos.

A visita a Bonaval  era obrigada. Celebrar a Antonio Fraguas e o proxecto que soñou toda a súa vida ata que en 1976 se fixo realidade. Este museo pretende poñer en valor a cultura tradicional, dende a arquitectura ata a elaboración de embarcación, as ferramentas de traballo do campo e do mar...