A FEIRA DE LIBROS: UN ÉXITO TOTAL

O sábado 15 de decembro celebramos a FEIRA DE LIBROS. A verdade é que organizala supuxo un laborioso proceso no que o protagonismo correu a cargo do alumnado de 1ºESO do Equipo da Biblioteca. Precisamente este era un dos principais obxectivos da actividade. Outro, por suposto, o leitmotiv da mesma: darlle unha nova vida aos nosos libros. En palabras de Pablo Chaves: "Preferimos 100 persoas que lean que 1000 libros na biblioteca".

Ben é  verdade que a meteoroloxía non axudou demasiado, pero entre os participantes o entusiasmo era desbordante. Así que, vencendo as adversidades, o noso posto da FEIRA DE LIBROS estivo toda a mañá á disposición do público da nosa cidade. Boa parte das persoas que se achegaron ata o nós e levaron libros eran amigas, parentes, coñecidas, pero tamén houbo persoas descoñecidas que se interesaron e colleron as obras que levamos á Feira. Todas elas nos felicitaron pola iniciativa. Foi interesante a experiencia de ter que orientalas segundo os seus gustos e preferencias. Case todas levaban libros para ler elas mesmas e para agasallar. Desta maneira contribúen a que a nosa actividade teña un impacto maior. 

Así que consideramos que acadamos os obxectivos que nos propuxemos: visibilizamos a Biblioteca e o instituto, o Equipo do alumnado fomos os protagonistas de cada unha das tarefas que levamos a cabo para desenvolver a actividade e démoslle unha nova vida a moitos dos nosos libros. Un éxito total!

Agora xa temos ganas de que chegue o bo tempo para repetir a experiencia!

Algunhas das persoas que se achegaron eran coñecidas, familiares e amigas

Houbo persoas descoñecidas que nos felicitaron pola iniciativa

Comentábannos as súas preferencias e nós orientábamolas para que atopasen o que buscaban

Como a nosa primeira compradora (na imaxe superior), 

case todas levaban libros para agasallar e para ler elas mesmas

TRABALLANDO CON MOITA ILUSIÓN PARA A FEIRA DOS LIBROS

Levamos unha semana traballando duramente para preparar o material da FEIRA DE LIBROS que vai ter lugar o sábado 15 de decembro pola mañá na rúa da Baldosa, se o tempo o permite.

SONIA MIRÓN AGASALLOUNOS COAS SÚAS NOVELAS

A escritora Sonia Mirón estivo estes días traballando como profe no noso instituto. Antes de despedirse quixo facernos estes tres magníficos agasallos: as tres novelas das que é autora. Protagonizadas por adolescentes, son historias cheas de valores que nos convidan a reflexionar sobre as relacións persoais, a importancia do autoconcepto, os conflitos, os cambios... Son libros moi chulos, por fóra e por dentro.

"Si tú quieres", que é a súa primeira novela, xa vai pola 5ª edición e "Hai un sol dentro de mí", que trata sobre o acoso escolar, pola 3ª. "Mi corazón en una caja de zapatos" é a súa última creación. Precisamente esta semana recibía Sonia os primeiros exemplares na súa casa. De feito, a presentación pública aínda se vai celebrar a vindeira semana. Así que nós temos a primicia desta obra tan prometedora. 

Non deixedes de pasar pola biblioteca e pedídeos canto antes, que voan!

E moitas grazas a Sonia pola súa xenerosidade!

Na imaxe de arriba vemos a Sonia coas súas alumnas de 3ºESO-A. Abaixo podemos ver as atractivas portadas destas tres novelas.

CHEGOU O NADAL Á BIBLIOTECA: PREPARÁDONOS PARA UN PRÉSTAMO EXTRAORDINARIO

Chega o Nadal e a Biblio Bouza loce as súas mellores galas. Agora só nos falta fichar unhas pouquichiñas novidades recén chegadas e xa temos todo listo para facer un préstamo masivo.
Queremos que levedes varios libros e pelis, polo que imos ampliar o número de volumes de préstamo. Se logo non dá tempo a ler ou ver todo, pois, noutro momento será... Pero se non levades os libros chulos que temos á vosa disposición, ficarán aborrecidos nos andeis botando en falta uns ollos que enchan de vida todas as historias, ideas e fantasías que conteñen.
                                                  Ide pensando que libros queredes levar!!!

FEIRA DE LIBROS: UNHA NOVA VIDA

O vindeiro sábado 15 de decembro celebraremos a FEIRA DE LIBROS. De 11:00 a 14:30 na zona da rúa da Baldosa imos poñer un posto que estará atendido polo alumnado do Equipo de Biblioteca. O intercambio consistirá en levar libros a cambio dunha doazón simbólica de 2€ por un libro e 5€ por 3. No proceso de transformación e renovación queremos darlle unha nova vida aos libros repetidos ou que non axeitan ás necesidades dunha biblioteca escolar.

                                          Ven ver se temos o libro que che gusta!!

TRANSFORMÁNDONOS COS CONTOS DO OUTONO

Alumnas e alumnos protagonistas na actividades dos Contos do Outono 18

Cando estaba a piques de rematar o mes de novembro tivo lugar unha das grandes citas anuais: o Contos do Outono. O concurso de contacontos celebrouse este curso baixo o lema: "Transformándonos". Este é o leitmotiv escollido pola Biblioteca para que faga de fío condutor de todas as actividades organizadas. Xa que logo, os contos trataban sobre as metamorfoses, os cambios, as transformacións... Ben é verdade que houbo pouca fantasía e pouco terror. A maiores das historias versaban sobre os cambios vitais. Houbo accidentes, enfermidades, cambios de residencia, de colexio e mesmo orfandades. Iso si, non faltou o humor. Mesmo tivemos un monólogo filosófico a cargo de Joel Rubio.

Novamente un traballo moi difícil foi o do xurado. Nerea, Aizaia, Iván, Melisa e Vicenzo non tiveron 

demasiado tempo para deliberar e os concursantes puxéronllo moi difícil. Finamente, cando estaba eran horas de marchar, irrumpiron do Salón de Actos co veredicto e puidemos celebrar unha entrega de premios a fume de carozo.

As gañadoras desta edición foron Celia Gamarra e Sabela Leiro, de 1ºESO; Maïna Duteil e Tomás Cores, de 2ºESO ; Clarisse Gallego e Anxo Lúa, de 3º.

Pero hai que felicitar a todas as persoas que subiron ao escenario, polo seu talento, pola súa coraxe e por facernos pasar, un ano máis, tan bos momentos.

Noraboa a todas/os!!!

O xurado tivo que estar moi concentrado no seu traballo

Luz Fernández González (1ºESO-A)

Cibrán Santórum (1ºESO-B)

Gabriel Paleo (1ºESO-B)

Alex Antón Abalo (2ºESO)

Tomás Cores Domínguez (2ºESO-B)

Laura Ortega Barreiro (2º ESO-B)

Diana Negro Pardal (2ºESO-A)

Anxo Lúa (3ºESO)

Iago Lorenzo Dios (3ºESO)

Joel Rubio (3ºESO-A)

Celia Gamarra e Sabela Leiro (1ºESO-A)

Clarisse Gallego Fontaine (3ºESO-B)

Magnífico traballo o de Nicolás Lucio e Sandra Rodiño 

presentando o concurso

Tomás e Aarón, de 1ºESO-B e Pablo de 1ºESO-A 

amenizaron a espera do veredicto 

contando unhas historias fóra de concurso.

Celia Gamarra, Sabela Leiro, Maïna Duteil, Clarisse Gallego, Anxo Lúa e Tomás Cores, gañadoras/es desta edición dos Contos do Outono.

COMPRAS COMISARIADAS POLO EQUIPO DE ALUMNADO DA BIBLIOTECA

A actividade das compras comisariadas polo Equipo de alumnado Biblioteca resultou un éxito. Os participantes deron mostra dunha grande responsabilidade. Pecudaron, leron, reflexionaron e seleccionaron unha chea de libros para traer á Biblioteca. Foi moi emocionante. Moitas das participantes viñan cheas de ilusión e mesmo lendo os libros pola rúa. Astronomía, Medicina, Feminismo, Manga, historias LGTB, sobre a 2ª Guerra Mundial, Física, grupos de música...

As traballadoras da librería sorprendidas do ben que se portaron 23 adolescentes fedellando por todo o local.

Sobrepasamos os obxectivos que nos marcamos!!!

CONTOS DO OUTONO: TRANSFORMÁNDONOS

Este próximo venres 30 de novembro celebraremos baixo o lema "Transformándonos" unha nova edición do noso tradicional concurso de contacontos. Nel participará o alumnado de 1º, 2º e 3º da ESO que leva semanas preparando as súas mellores historias de metamorfoses, cambios vitais e transformacións. Seguro que vai ser unha interesantísima cita no salón de actos do noso centro, a partir das 12:50 e ata as 14:30.
                                                                  Moita sorte a todas/os as participantes!!!

LECTURAS FRONTE AS VIOLENCIAS DE XÉNERO!

Son moitas as propostas de lectura para reflexionar sobre a violencia de xénero. Dende Pascual Alapont co a súa novela O inferno de Marta, pasando por A cabeza de Medusa de Marilar Aleixandre, os Diario azul e Diario violeta de Carlota de Gemma Lienas, sen esquecer unha das nosas autoras favoritas, Montse Fajardo co seu libro Invisibles, que da man de do grupo Rerum chegou a Vilagarcía en forma de obra de teatro a pasada fin de semana, ou Si es amor, no duele, de Pamela Palenciano, que con forma de monólogo e baixo o título No sólo duelen los golpes puidemos ver o pasado curso no Auditorio.

Todos estes títulos a algúns están á vosa disposición na biblioteca e forman a exposición da nosa vitrina con lectura a conto do 25N. Non deixedes de botarlle un ollo.

ANTÓN BLANCO CASÁS: VERSOS PARA NÓS

Este mes o alumnado de 1º ESO-A rotulou o poema dun poeta vilagarcían novo: Antón Blanco Casás, que nos fixo chegar unha composición do seu primeiro libro A oseira, publicado na editorial Chan da Pólvora en 2016. Antón, que estivo no noso instituto no pasado mes de xuño nun encontro no Club de Lectura, quixo enviarnos este poema xa que nel evoca a traxedia do naufraxio de Sálvora e as súas heroínas. Estas últimas semanas estivemos traballando nas aulas sobre esta impactante traxedia que hai case 100 anos que se produciu. Nicolás, alumno de 1ºESO-B, achegou á aula un exemplar de O Santa Isabel. Emigración, traxedia e heroísmo, un libro resultante da exposición dirixida por Pilar Casas Gil no ano 2014. Este libro forma parte da biblioteca do colexio no que traballa a súa nai en Ribeira, que ten por nome CEIP Heroínas de Sálvora, situado en Aguiño. 

CONTRA AS VIOLENCIAS

Estamos a preparar a celebración do 25 de novembro, Día Mundial contra a violencia de xénero. Antes de que o Concello de Vilagarcía propuxese unha actividade para que participase o alumnado de 1º e 3º da ESO onda a Casa Consistorial, xa desde a Biblioteca nos puxeramos a organizar xunto coa profe de Música unha actividade consistente en cantar dous temas de dúas grandes artistas: Rozalén e Guadi Galego. Trátase de "La puerta violeta" e "Coidar de min".

As cancións serán interpretadas polos grupos que non asistan ao acto do Concello ás 11h. no salón de actos.

O ALUMNADO DA FPB NAS SESIÓNS DE FORMACIÓN DE USUARIOS

2ºde FPB vén de participar na sesión de formación de usuarios. A semana pasada foi o grupo de 1ºFPB o que participou na sesión que organizamos para presentarlle a Biblioteca ao alumnado de nova incorporación e para comentar aspectos do funcionamento e da organización actual ao grupo no seu conxunto. A ocasión serviu tamén para asignarlle cadanseu número de lector.

O certo é que todo empezou o xoves día 8 de novembro, cando Ánxela e Moisés estrearon un dos recunchiños de lectura e Ánxela pediu o seu número de lectora. Fixémosllo nese mesmo momento e decidimos que era imprescindible organizar unha xornada de formación para o alumnado de FPB e a asignar un número a todos e cada un dos alumnos que aínda non o tivesen.

O xoves da semana pasada, o 15 de novembro, foi o grupo de 1º quen participou na sesión de formación e este mércores, o día 21 de novembro, foi o grupo de 2º. Aproveitamos asemade para colocar os letreiros que sinalan a sección, a temática dos libros que están nos andeis.