NO DÍA DO LIBRO RECIBIMOS TAM: O PRIMEIRO MANGA EN GALEGO

O alumnado do Agrupamento de 1ºESO xa ten nas súas mans a obra que vai ter como lectura neste trimestre para Lingua Galega. Chegou, xusto para celebrar o Día do Libro, o primeiro manga en galego. Trátase de Tam, a historia dunha rapaza que loita contra a morea de imposicións absurdas que padecen as mulleres sobre o seu aspecto físico. O libro é unha crítica chea de humor ao absurdo consumismo que nos devora en relación á moda e ao corpo. 

A autora, Anémona de Río, vén de gañar o Premio de fin de estudos do Garaxe Hermético, dirixido por Kiko da Silva, e que conta cun destacadísimo elenco de profesores (Fernando Iglesias, Miguel Porto, Fran Bueno, Fernando Llor e Miguelanxo Prado).

Anémona de Río é así mesmo a autora da portada do vindeiro número da revista de banda deseñada dos Equipos de Normalización Lingüística do Salnés que está a piques de publicarse.

23 DE ABRIL: CAMIÑANDO CON MARCOS CALVEIRO POLAS RÚAS DE VILAGARCÍA

Para celebrar o Día do Libro, o alumnado de 1ºBach. participou nun roteiro literario co autor de O xardineiro dos ingleses, o vilagarcián Marcos Calveiro. Moitos dos participantes no paseo literario xa leran a novela ambientada na nosa cidade. O escritor, de forma clara e amena foi comentando as localizacións de diversos sucesos históricos e momentos da trama da novela.

A prensa recolleu deste xeito a actividade:

É ben coñecido o afán de documentación que move a Calveiro antes de comezar cada novela. Así acontece, por exemplo, en Festina lente, Fontán ou Settecento. Neste roteiro literario, Calveiro amosou a súa capacidade para comunicar, non só na ficción, senón tamén co relato oral, e esa paixón polo pasado que se atopa en moitos dos lugares polos que transitamos cada día.

CAMIÑO LONGO DE CABANILLAS

Que poema tan fermoso de Ramón Cabanillas escolleu o alumnado de 4º da ESO para o noso taboleiro "Camiñando entre versos"! Forma parte do primeiro libro que publicou Cabanillas, foi no ano 1915 na Habana. O libro titúlase Vento mareiro e foi recibido dentro da cultura galega con entusiasmo, xa que a calidade lírica do poeta de Cambados facía pensar en tempos bos para a poesía galega. 

O texto é fermoso e triste ao mesmo tempo. Está cheo de metáforas entre as que destaca a que dá título ao poema. Cabanillas compara a súa vida cun camiño longo e cheo de dificultades. Foi musicado cunha sensibilidade extraordinaria por Luís Emilio Batallán e editado no seu disco "Aí vén o maio", onde interpreta tamén poemas de Celso Emilio Ferreiro, Rosalía de Castro e Curros Enríquez.

CAMIÑO LONGO

Camiño, camiño longo,
camiño da miña vida,
escuro e triste de noite,
e triste e escuro de día...
camiño longo
da miña vida!

Vereda, vereda torta
en duras laxes aberta,
arrodeada de toxos,
crebada polas lameiras...
vereda torta,
ti onde me levas!

Camiño, camiño longo.
A choiva, a neve e as silvas
enchéronme de friaxe,
cubríronme de feridas...
camiño longo
da miña vida!

Vereda, vereda fonda
de fontes tristes, sin ágoa;
sin carballos que den sombra,
nin chouzas que den pousada...
vereda fonda,
ti cando acabas!

EXPOSICIÓN DO CONCURSO DE ADHESIVOS DO SALNÉS

DO PERGAMIÑO AO DIXITAL.

O PATRIMONIO CULTURAL GALEGO: MILENARIO E CON FUTURO

Xa están expostos os traballos realizados polo alumnado da ESO do noso centro para participar no XXIV Certame de Adhesivos pola Normalización organizado polos Equipos do Salnés. A Biblioteca en colaboración co Equipo de Normalización Lingüística e o Departamento de Lingua Galega vén de montar unha pequena exposición con todos eles.

Durante esta semana asemade podemos ver a exposición dos traballos finalistas e gañadores do certame, entre os que se atopan os das alumnas do noso instituto Clarisse Gallego, gañadora do 2º premio na categoría de 1º e 2º ESO, e os de Carla Alcaine e Alejandra  Lores, finalistas nesta mesma categoría, así como o de Irea Álvarez Ferreiro, na categoría de 3º e 4º ESO.

POLOS CAMIÑOS DE TRASALBA E A VIDA DE OTERO PEDRAYO

O martes 17 de abril a primavera por fin sorriu con toda intensidade nas terras ourensás de Trasalba e Ribadavia. Por estes lares andaron a corricar as alumnas e alumnos de 2ºESO nunha proveitosa saída didáctica dos departamentos de Xeografía e Historia e Lingua Galega en colaboración coa Biblioteca. Ao rematar a visita á casa de Otero Pedrayo e as actividades correspondentes, Uxía Saborido, dende a solaina, deu lectura a un texto no que a fantasía a levou a se converter en amiga do gran escritor. 

A seguir, fixeron un pequeno roteiro literario dando lectura a fragmentos de diferentes obras que facían referencia aos lugares onde eran lidos. 

Ao mediodía, non desaproveitaron a ocasión para mergullarse nas augas termais de Outariz, en Ourense, e do rebuldeiro correr do río Miño. Xa pola tarde en Ribadavia fixeron unha actividade de descuberta desta fermosa vila medieval.

As imaxes amosan o moito que traballaron e o moito que gozaron desta saída didáctica. Non é de estrañar que pidan máis, por favor!!!

UN MURAL PARA MARÍA VICTORIA MORENO

O alumnado de Agrupamento de 1º ESO elaborou este vistoso mural sobre María Victoria Moreno, autora á que se lle dedican este ano as Letras Galegas. É a 4ª ocasión en que unha muller é homenaxeada nesta celebración. Na primeira ocasión (1963) dedicóuselle a Rosalía de Castro. En 1987 Francisca Herrera Garrido e en 2007 María Mariño Carou foron as homenaxeadas.

María Victoria Moreno foi galega por decisión propia. Naceu nunha vila da provincia de Cáceres e viviu en diferentes lugares como Sepúlveda, Madrid e Barcelona. Cando chegou a Galiza decidiu empregar a nosa lingua e converteuse nunha activista a prol do idioma. Tamén foi unha defensora dos dereitos das mulleres. 

Como era profesora, foi moi consciente da necesidade de que houbese na literatura galega obras dirixidas ao público xuvenil e infantil. Por iso se puxo mans á obra e foi pioneira neste eido. Obras de gran éxito foron "Leonardo e os fontaneiros" e "Anagnórise". 

María Victoria Moreno foi tamén unha grande amante dos animais, especialmente dos cans, como queda reflectido na historia de Leonardo.

CAMIÑAN DESCALZAS, UN POEMA DE ANA ROMANÍ

Ana Romaní é unha das poetas máis importantes da literatura galega. Destaca a enorme calidade dos seus versos e a coherencia do seu discurso poético. Ademais, leva conducindo o programa radiofónico Diario Cultural da Radio Galega dende hai case tres décadas. Foi elixida como académica da RAG hai menos dun mes (a mediados de marzo de 2018) e, a día de hoxe, aínda non pronunciou o seu discurso de ingreso.

O alumnado do agrupamento de 2º da ESO escolleu o coñecido poema "Camiñan descalzas polas rochas". Neles a autora fálanos do traballo que realizan as mulleres na sociedade. Di que é efémero, ou sexa, que dura pouco tempo, pero que, ao mesmo tempo, é o que verdadeiramente permanece.