EU TAMÉN NAVEGAR!

Xohana Torres deixounos o 12 de setembro de 2017, cando a chuvia anunciaba o comezo das clases no Instituto.

Esta autora, pioneira en tantos aspectos, agasallounos cunha poesía chea de calidade e lirismo, que transita entre o mar de Ferrol e Vigo e as terras de Compostela ou o Ribeiro. Desta bisbarra vitivinícola ourensá era orixinaria a súa avoa, a quen dedicou o seu último poemario Elexías a Lola, publicado en 2016. Do mundo físico e estético que Lola lle ofreceu naceu unha sensibilidade e unha estética inconfundíbel.

Na nosa biblioteca a penas tiñamos un exemplar de Adiós, María, recén adquirido a finais do curso pasado e aínda sen fichar. Deunos traballo, pero grazas á xenerosidade dos nosos colaboradores, logramos facer unha vitrina moi completa coa obra da autora.

Os seus versos tamén nos acompañan no vestíbulo do centro. O alumnado de 2ºESO-A vén de rotular o coñecido e reivindicativo poema Penélope, que poderemos ler no espazo do poema do mes.

OS CAMIÑOS DO CLUB DE LECTURA

O noso Club de Lectura vai comezar a súa andaina cos camiños do máis alá da man da coñecida novela Un monstro vén a verme de Patrick Ness e Escarlatina, a cociñeira defunta de Ledicia Costas. Dirixidas ao grupo de adultas/os (alumnado de Bacharelato, profes e persoal non docente) serán as lecturas de Os camiños na auga de Núñez Singala e Los tres nombres del lobo de Lola P. Nieva. Esta será a andaina polos camiños vitais e da historia.

Un monstro vén a verme de Patrick Ness, editado en galego pola editorial Kalandraka,

 encetará os camiños do máis alá no Club de Lectura Nao Senlleira do noso IES 

A MEMORIA DA AUGA

Queremos comezar este curso cunha historia que nos leva polos camiños do mar. Mathieu Reynès é o guionista que nos ofrece a historia de Marion. Este criouse entre o País Vasco francés e Burdeos e nesta historia fainos chegar o recendo do mar e as misteriosas historias que vencellan aos habitantes da costa co seu pasado. Marion é unha adolescente que vai, xunto coa súa nai, vivir á casa da infancia materna. Nesta vivenda, situada enriba dun imprsionante cantil, descubrirá o pasado dos seus avós e os estraños vencellos que ela mesma ten cun inquietante fareiro... 

Valérie Vernay é a ilustradora.  Os realistas debuxos que nos ofrece transpórtannos a un mundo de brétemas con máis sombra e escuridade ca luces...

CAMIÑOS

Botamos a andar.

Neste curso 17-18 percorreremos moitos vieiros, faremos camiños de ida e de volta a través dos versos, das historias e das músicas que entrarán e sairán da nosa Biblioteca.

Camiño branco, de Rosalía; Camiño longo, de Cabanillas; Os camiños da vida, de Otero Pedrayo; Camiños de luz e sombra, de Manuel María; Camiños na auga, de Núñez Singala ou Camiños de Lamatumbá. Sen esquecer On the road de Jack Kerouac ou os múltiples camiños de Machado.

Neste emocionante e intenso percorrido que temos por diante haberá un lugar moi especial María Victoria Moreno, escritora da literatura galega que veu de Cáceres e que converteu o galego na súa lingua. Con ela acompañaremos ao protagonista de Anagnórise na viaxe de ida e volta que o levará a atoparse consigo mesmo.

Faremos en varias ocasións o camiño a Vigo, xa que o noso destino será o Museo do Mar, para ver cos nosos propios ollos o Pergamiño Vindel que percorreu un longo camiño desde Nova York para poder ser exposto no lugar cantado nas 7 cantigas de Martin Códax que contén, ou sexa, no mar de Vigo.

Ledica Costas levaranos a pasear con Jules Verne polas rúas de Vigo para coñecer o inventor e empresario Sanjurjo Badía e a misteriosa vida das mulleres planta.

Agárdanos en Trasalba, Otero Pedrayo, o autor de Os camiños da vida. Neste percorrido por terras ourensás, pararemos tamén na cidade medieval de Ribadavia.

Camiñaremos entre palabras de mulleres e polos versos que convidan a non ficar paradas, a ir sempre máis alá: como os versos de Xoana Torres, a recentemente falecida poeta do mar. E é que a navegación que comezamos o curso pasado, continúa agora por ar, por terra e por mar.

Agardámosvos, coma sempre!

NAUFRAXIO: UN POEMA DE X.M. ÁLVAREZ BLÁZQUEZ

O alumnado de 2º ESO-B vén de escoller un novo poema da semana titulado "Naufraxio". É un texto do poeta e editor X.M. Álvarez Blázquez. Publicado no seu poemario Canle segredo. Trátase dun soneto de temática amorosa en ambiente mariño, temática e ambientación moi preferidas polo autor.

Por certo, das lembranzas máis queridas polo autor están as vivencias dos seus veráns en Baión, cando xogaba da mañá á noite en absoluta liberdade coa enorme requitropa que formaban os seus irmáns, curmás e curmáns. Aínda que a parroquia de Baión pertence actualmente ao concello de Vilanova, durante unha etapa do século XX Baión pertenceu ao concello de Vilagarcía de Arousa.