Os venres 31 de xaneiro e 7 de febreiro tivemos dúas interesantísimas sesións na Biblioteca sobre o que xeramos, a xestión do mesmo, a necesidade de separar e reciclar e, sobre todo, de reducir o uso dos plásticos dun só uso na nosa vida cotián. A actividade preparouna a Biblioteca do noso IES en colaboración con Diego Lodeiro, ex-alumno do Bouza Brey e integrante de Tropaverde, empresa de economía circular que ten como principal ocupación fomentar hábitos de reciclaxe entre a poboación de diversos concellos galegos, de fóra de Galiza e incluso en distintas cidades europeas.
Comezamos cunha actividade motivadora para ver que coñecementos previos tiñamos sobre a materia. Foi un divertido kahoot que resolvemos por equipos. En cada quenda, o grupo gañador recibiu un agasallo ecolóxico.
Logo adentrámonos no mundo dos residuos a través dunha charla interactiva a cargo de Diego Lodeiro. Nela puidemos reflexionar sobre o impresionante volume de lixo, especialmente plástico, que xeramos no noso consumo diario.
Ao rematar a sesión entregouse a cada alumna e alumno unha folleto cunha enquisa sobre os hábitos de consumo doméstico. A enquisa tiña como obxectivo que se reflexionase en familia, no fogar, sobre o que facemos realmente en relación ao medioambiente, non só o consumo de plásticos, senón o consumo de enerxías non renovábeis.
Na segunda sesión fixemos unha posta en común de todas as preguntas da enquisa asignándolle ás respostas uns valores numéricos, positivos ou negativos. Finalmente puidemos cuantificar, de maneira meramente orientativa, a calidade dos nosos hábitos en relación co medioambiente.
Para rematar, Diego Lodeiro explicou que é Tropaverde e as accións que o Concello de Vilagarcía promove a través das actividades desta entidade.
Dende a Biblioteca seguiremos traballando este tema vital para o futuro do planeta. A enorme satisfacción cos resultados da actividade fainos pensar na posibilidade de levala adiante con outros niveis, xa que desta volta participou o alumnado de 1º e 2ºESO. É complexo organizalo, pero con seguridade, paga a pena.
